2016/03/11

Tratu onei buruz hausnartzen

Pertsonak izaki sozialak gara, bizitzeko elkarren beharra dugu, harremantzeko beharra. Jaiotzen garen momentutik hasten gara harremantzen: gurasoekin, neba-arrebekin, haur eskolako umeekin, eskolako irakasleekin, lagunekin, lankideekin, bikoteekin, auzoko dendariekin, seme-alabekin… Etengabe eta bizi osoan zehar harremantzen gara eta harremantzeko beharra dugu. Harreman horiek era askotan egokitzen ditugu gure plazera lortzeko edo gure behar afektibo, sexual eta emozionalak asetzeko. Agerikoa da harremanetatik ikasi egiten dugula, hauekin aldatu egiten garela eta heldutasunerako bide ditugula. Edonola ere, argi dagoena zera da: harremandu egiten garela, harremanak egiten ditugula, harremanek egiten gaituztela.


Ikastetxeetan harremanei duten garrantzia ematea ezinbestekoa da, eguneroko praktika hezitzailean gertatzen diren hartu-emanei arreta eskainiz, estereotipoak ezabatzen dituen giroa sortuz eta onespena eta komunikazioan nagusitutako harremanak bultzatuz. Tratu txarren praktikak (indarkeria, oldarkortasuna, diskriminazioa, bortizkeria…) tratu onen praktikengatik (bizikidetza, elkarlana, lankidetza…) trukatzean datza gakoa.
Tratu onetan hezteko auto-estimua, berdintasuna eta trataera egokiak bultzatzea ere ezinbestekoa da.
     Gaztaroan harremanek esangura berezia hartzen dute. Lagun arteko eta bikote harremanak izan ohi dira gazteon bizitzetan eta poztasun eta kezka iturri garrantzitsuenak. Lagunen artean, taldearen parte sentitzea, garen bezalakoak onartuak izatea, kontu garrantzitsua da gazteontzako. Barren-barrenean sortzen zaigun beharra da eta zenbait kasutan gure nortasuna, edo gutxienez kanpora begirako aurpegia, eraldatu genezake taldearen onarpena lortzearren.

Tratu onak hezkuntzan lantzeko erronkak:
  • Hezkuntzaren erdigunean zaintza jartzea.
  • Pertsonaren garapen osoa aldarrikatzea.
  • Zaintzari, harremanei, emozioei, alderdi sozialari… arreta jartzea.
  • Pertsona erdigunean jartzea.
  • Pertsona bere osotasunean begiratzea.
  • Estereotipoen inguruko kontzientzia hartzea. 


iruzkinik ez:

Argitaratu iruzkina